நான் பி.இ. இறுதியாண்டுக்குச் செல்லவிருக்கிறேன். எனது படிப்பைத் தவிர சாப்ட் ஸ்கில்ஸ் என்னும் திறமைகளையும் வளர்த்துக் கொள்ள வேண்டும் என அடிக்கடி கேள்விப்படுகிறேன். சாப்ட் ஸ்கில்ஸ் என்றால் என்ன?
ஜூலை 04,2008,00:00 IST
இது இன்று நமது மாணவர்கள் பலரிடம் இருக்கும் ஒரு முக்கியமான சந்தேகம். நமது பாடத் திறன்களுடன் ‘ஸாப்ட்‘ திறன்களையும் வளர்த்துக் கொள்ள வேண்டும் என்றே நமது நிறுவனங்கள் எதிர்பார்க்கின்றன.
இன்று வேலை வாய்ப்புத் துறையால் அதிகம் பேசப்படும் வார்த்தையும் இது தான். ஒரு நிறுவனத்தின் அடிப்படை உற்பத்தி அல்லது சேவையாடு தொடர்புடையது அந்த நிறுவனத்திற்குத் தேவைப்படும் சாப்ட் திறன்கள்.
அடிப்படையில் சாப்ட் திறன்கள் என்றால்
* தகவல் தொடர்புத் திறன்கள்
* சக ஊழியர் அல்லது பணியாளரோடு பழகும் திறன்கள்
* குழுத் திறன்கள்
* தலைமை தாங்கி வழிநடத்தும் திறன்கள்
* அடிப்படை சுபாவம்
* இணைந்து செயலாற்றும் மனப்பாங்கு
* தட்டிக்கொடுத்து ஊழியர்களை ஊக்குவித்து அவர்களது அடிப்படை செயலாற்றும் திறனை மேம்படுத்தும் திறமை ஆகியவற்றைக் கூறலாம்.
இன்று இந்த சாப்ட் ஸ்கில்ஸ் மேம்பாட்டுக்கு உதவ எண்ணற்ற மனிதவள மேம்பாட்டு பயிற்சி நிறுவனங்கள் மதுரை போன்ற சற்றே பெரிய நகரங்களில் செயல்படுகின்றன. ஊரகப் பகுதியில் படிக்கும் உங்களைப் போன்ற மாணவர்களுக்கு இவை நிச்சயம் உதவும். இன்ஜினியரிங் இறுதியாண்டில் நுழைந்தவுடன் இவற்றில் சேரலாம்.
நீங்களாகவே சாப்ட்ஸ்கில்ஸை வளர்த்துக் கொள்வதும் முடியாத காரியமல்ல. ஆங்கிலத்தை வளர்த்துக் கொள்ளும் முயற்சிகள், செய்தித்தாள் வாசிப்பு, பொதுவான தலைப்புகளை விளையாட்டாக நண்பர்களோடு விவாதித்தல் போன்றவற்றை நீங்கள் தொடர்ந்து பொழுது போக்காக செய்தாலே இவை வளர்ந்து விடும். உங்களது பாடத்தில் நீங்கள் பெற்றிருக்கும் திறன்களைப் போலவே இந்த சாப்ட் ஸ்கில்சும் மிக மிக முக்கியம்.